XVIII Өрөспүүбүлүкэтээҕи “Көтүөххэ үрдүккэ хотойдуу” уоланнар ааҕыылара

Быйылгы XVIII төгүлүн ыытыллыбыт “Көтүөххэ үрдүккэ хотойдуу” уоланнар өрөспүүбүлүкэтээҕи ааҕыылара Арассыыйаҕа Педагог уонна Уһуйааччы, Саха сиригэр Үлэ сылларыгар ананан ыытылынна. Ааҕыылар икки түһүмэҕинэн ыытылыннылар. Түмүктүүр түһүмэх алтынньы 17 күнүгэр Дьокуускай куоракка Ф.И. Авдеев аатынан Оҕо айымньытын дыбарыаһыгар буолан ааста.

Бу аа5ыыларга Бүлүү улууһун Герой Н.С.Степанов аатынан орто оскуола “Уолан бөлөҕө” бастакы түһүмэх түмүгүнэн бастыҥнар ахсааннарыгар киирэн, оҕо сынньанар уонна доруобуйатын чэбдигирдэр “Бэс чагда” кииҥҥэ ыҥырылынна.

“Уолан бөлөх” бу күрэххэ Бүлүү улууһун Үлэ Геройдарын туһунан ааҕаннар “Дойдунаат” анал аакка тигистэ. Бөлөх салайааччылара саха тылын уонна литературатын учуутала М.К. Муксунова, Алгыс НКК методиһа М.С.Алексеева, оператор салайааччы Л.Г.Менкяров.

2005 сыллаахтан 18 сыл устата төрөөбүт дойдута, норуота сайдарын туһугар олоҕун анаабыт ытык дьоҥҥо сүгүрүйүү тыынын иҥэрэр сыалтан тэриллибит киэҥ тэрээһиннээх хамсааһыҥҥа Бүлүү улууһун “Уолан” бөлөҕө 2012 сылтан ыла тиһигин быспакка ситиһиилээхтик кыттан кэллэ.

Салайааччы Мария Касьянова Муксунова өр кэмнээх бииргэ үлэлээһинин түмүгэр тэрийээччилэр ааттарыттан “Саха АССР 100” сыла үбүлүөйүнэй мэтээлинэн наҕараадаланна.