Бүлүүгэ Ырыа күнэ

«Ырыа — олох аргыһа” диэн мээнэҕэ эппэтэх буолуохтаахтар. Саха киһитэ оһоҕун иннигэр олордо да олонхоһут, оҕуһун мииннэ да ырыаһыт. Ыам ыйын 21 күнэ Саха Өрөспүүбүлүкэтигэр Ырыа күнэ. Үбүлүөйдээх Ытык Бүлүү куоратыгар «Бүлүү ыллыыр» диэн бэрт сэргэх ырыа түһүлгэтэ буолан ааста. Бу күн 40-ча нүөмэрдээх биэс бөлөххө арааран араас ырыалардаах улахан кэнсиэркэ араас көлүөнэ дьон кыттыыны ыллылар. Бастакы бөлөх оҕолор ырыаларыгар аналлаах, Бүлүү кырачаан толорооччулара, ырыа ансаамбыллара ырыаларын көрөөччүлэргэ бэлэхтээтилэр.

Российскай Федерацияҕа Дьиэ кэргэн сыла биллэриллибитинэн кэнсиэрт иккис бөлөҕө дьиэ кэргэҥҥэ аналлаах ырыалары ыллаатылар.

Үһүс бөлөххө Ырыа күнүгэр аналлаах ырыа туһунан ырыалар ылланнылар.

Төрдүс бөлөх ананна ырыа куттаах ырыаһыттарбыт «Ырыа-олох аргыһа» диэн ааттаах биирдиилээн ырыаһыттар толорууларыгар.

Бүтэһик бэһис бөлөх Саха Өрөспүүбүлүкэтин культуратын үтүөлээх үлэһитигэр Бүлүү куорат Бочуоттаах олохтооҕо, «Алампа» общественнай бириэмийэ Лауреата, Саха Өрөспүүбүлүкэтин Сойууһун уонна байаныыстар сойууһун чилиэнэ Туласынов Иван Ивановичка. Бу сыл ырыа айааччы, аранжировщик, композитор, Бүлүүбүт киэн туттар киһибит Иван Туласынов 65 сааһын туолар үбүлүөйдээх сылыгар ананна.

Сахалыы ырыа үрдүктэн үрдүккэ дьиэрэйдин! Ырыабыт күнэ саҥа ырыаларынан, эдэр кэскиллээх, инникилээх ырыаһыттарынан сайда, үүнэ турдун! Ырыаны таптааҥ, истиҥ, сэҥээриҥ, ыллаһыҥ, ыллааҥ!