Степан Максимович Аржаков үтүө аатын үйэтитии

Саха сиригэр Автономия төрүттэниитигэр көмүс буукубанан суруллубут ааттартан биирдэстэрэ, Саха АССР ис дьыалаҕа наркомунан, Совнарком бэрэссэдээтэлинэн үлэлээбит бастакы бассабыык революционердартан биирдэстэрэ, биллиилээх Судаарыстыбаннай, политическай уонна общественнай деятелэ, Сахабыт сиригэр олох саҥа саҕахтарын арыйсыбыт, норуот сайдар суолун төрүттэспит Бүлүүлэр биир дойдулахпыт Степан Максимович Аржаков буолар.

Саха Автономнай Советскай Социалистическай Өрөспүүбүлүкэтин тэриллибит күнүн чэрчитинэн Бүлүү куоратын общественноһа, ыалдьыттара Степан Максимович Аржаков пааматынньыгар муһуннулар.

С.М.Аржаков үтүө аатын үйэтитиитин, Советскай Союз Геройа Николай Саввич Степанов аатынан Бүлүүтээҕи 3 нүөмэрдээх орто оскуолатын үөрэнээччилэрэ «Уолан » бөлөх литературнай ааҕыыннан арыйда. Салайааччы Муксунова Мария Касьяновна.

С.М.Аржаков Саха Автономията төрүттэнэригэр киллэрбит кылаатын сыаналаан туран, Саха сирэ сайдыытыгар анаабыт, олоҕун толук уурбут биир дойдулаахпытын чиэстээн тыл эттилэр:

Бүлүү улууһа (оройуона) муниципальнай оройуон баһылыга Сергей Николаевич Винокуров.

Саха Өрөспүүбүлүкэтин атыы-эргиэн, урбаанньыт уонна туризм Миниистирэ Тимур Юрьевич Ханды.

Саха Өрөспүүбүлүкэтин Ил Түмэн Судаарыстыбаннай Мунньаҕын депутата Александр Васильевич Гоголев.

«Бүлүү куорат» муниципальнай тэриллии баһылыгын эбээһинэһин толорооччу Николай Варламович Иванов. уо.д.а.

Саха сирин историятыгар биллэр — көстөр суолу хаалларбыт Степан Максимович Аржаков пааматынньыгар гирлянда, сибэкки ууруутунан түмүктэннэ.

С.М.Аржаков туһунан сырдык өйдөбүл буолан үйэттэн үйэҕэ, көлүөнэттэн көлүөнэҕэ ааттана туруоҕа!