Бүлүүгэ Оһуохай күнэ

2023 сыл балаҕан ыйыгар Ил Дархан Айсен Николаев сылын аайы ыам ыйын 25 күнүгэр Оһуохай күнүн олохтуур, бэлиэтиир туһунан ыйаахха илии баттаабыта. Онон Оһуохай күнүн аан бастаан бэлиэтиибит. Бу күн Бүлүү куоратыгар, Ленин болуоссатыгар Оһуохай түһүлгэтэ буолан ааста. Оһуохай күнүн Алгыс тылынан арыйда В.О.Каратаев аатынан олоҥхоһуттар уонна тойуксуттар норуодунай кэллэктиип алгысчыта, олоҥхо толороооччута, Саха Өрөспүүбүлүкэтин култууратын туйгуна, оһуохайга “Саха сирин үтүөлээх этээччитэ” Мэҥкэр Сэмэн Хабырыыл Уола.

Бүгүҥҥү оһуохай түһүлгэтигэр уһуйаан иитиллээччилэрэ, оскуола оҕолоро, Бүлүү улууһугар уонна Өрөспүүбүлүкэҕэ биллэр оһуохай этээччилэрэ кыттыыны ыллылар.

Бүлүү куоратын баһылыга Ян Анатольевич Попов бүгүҥҥү оһуохай күнүгэр мустубут бар дьонугар махтал тылларын этиннэ.

Билиҥҥи кэмҥэ оһуохай түмсүүлэрэ оһуохайы тарҕатыыга үйэлээх үлэлэрин күүскэ ыыталлар, ону таһынан хас биирдии улуус, өрөспүүбүлүкэ салалтатын өттүттэн саха төрүт ырыатыгар-тойугар, тылынан уус-уран айымньытыгар болҕомто ууруллан, күүстээх өйөбүл баара бигэ тирэх буолар. Онон кэнники да сылларга оһуохайдьыттар ааттара ааттана, оһуохай үйэлэргэ ситимин быспакка, тэнийэ-тарҕана туруоҕа.

Норуоппутун арчылыыр, араҥаччылыыр, сомоҕолуур аналлаах оһуохайбыт үйэлэргэ дуорайа туруохтун!

Добавить комментарий

Ваш адрес email не будет опубликован. Обязательные поля помечены *