“Дьүрүһүйэ турдун хомуһум!”
Муус устар 14 күнүгэр Хампа сэлиэнньэтин “Эрэл” норуот айымньытын киинигэр саха хомуһун Аан дойдуга аатырдыбыт чаҕылхай талааннаах хомус ууһа,
норуот маастара, Саха Өрөспүүбүлүкэтин култууратын туйгуна, Арыылаах нэһилиэгин бочуоттаах олохтооҕо Иван Кононович Колодезников-Үрүҥ Уус төрөөбүтэ 50 сылыгар аналлаах “Дьүрүһүйэ турдун хомуһум!”
диэн кинигэ сүрэхтэниитэ уонна биирдиилээн хомуска тардааччылар күрэхтэрэ үрдүк таһымҥа буолан ааста. Кинигэни Иван Кононович олоҕун аргыһа Галина Захаровна оҕолорун, чугас аймахтарын, доҕотторун, бииргэ алтыспыт хомус уустарын, хомусчуттарын ахтыыларынан хомуйан таһаартарда.
Кинигэ сүрэхтэниитигэр Дьокуускай куораттан Аан дойдутааҕы хомус түмэлин уонна киинин дириэктэрэ Д.Д.Бястинов, Аан дойду виртуоз хомусчута, Аан дойдутааҕы хомусчуттар уопсастыбыларын сүбэһитэ С.С.Шишигин, Аан дойду виртуоз хомусчута, уһуйааччы, СӨ үтүөлээх артыыһа А.М.Дегтярева, Аан дойду кылаастаах хомус маастара Р.Г. Чемчоев-Чөмчөө Уус, Бүлүү улууһун култуура уонна духуобунай сайдыыга управлениятын начальнигын солбуйааччыта К.Н.Буслаева, И.Ф.Захаров-Кылыадьы Уус дьиэтин сэбиэдиссэйэ Е.П.Михайлова, Н.И.Ылахова аатынан “Алгыс” НКК уус-уран салайааччыта А.П.Евсеева, Хампа нэһилиэгин баһылыга А.А.Тимофеев, Бүлүү улууһун хомусчуттара кыттыыны ыллылар.
Биирдиилээн хомус тардааччыларга олус интэриэһинэй, долгутуулаах күрэх буолан ааста. Үс бөлөҕүнэн улуус нэһилиэктэриттэн, Бүлүү куоратыттан оҕолор, улахан дьон кытыннылар. Бөлөх аайы үстүү миэстэ уонна кылаан бириис олохтонно. Бастакы бөлөххө оҕолорго бастакы үрдэл Герман Чемезов (Хампа), 3 миэстэ Саша Павлова (Бүлүү) буоллулар. Иккис бөлөххө ыччаттарга кыайыылааҕынан буолла Эльза Данилова Дьөккөн нэһилиэгэ. Үһүс бөлөххө 1-кы миэстэ Наталья Егорова Р.Г.Чемчоев-Чөмчөө Уус оҥорбут хомуһунан наҕараадаланна, 2-с миэстэ Саввинова Нюргуяна Бүлүү куората, 3-с миэстэни Герасимова Антонина Хампа нэһилиэгиттэн ыллылар.
Кылаан-чыпчаал үрдүк аатын ылла Харлампьева С.П. (Бүлүү).
Маны таһынан анал бириистэри туттулар: Айталина Чиряева Аан дойдутааҕы хомусчуттар уопсастыбыларын сүбэһитэ С.С.Шишигин аатыттан, Коля Павлов (Бүлүү) Осипов П.Ф. анал бирииһин, Анна Николаева Бүлүү Аан дойду виртуоз хомусчута, уһуйааччы, СӨ үтүөлээх артыыһа А.М.Дегтярева бирииһин, ону таһынан Иван Кононович Колодезников-Үрүҥ Уус оҕолоро, аймахтара туруорбут бириистэрин туттартаатылар.
“Алгыс” фольклорнай ансаамбыл “Кыталыктар” М.Н.Жирков ырыатын кырыымпаҕа доҕуһуоллаан толордулар. Бу күн хомус ууһа Акимова Софья Иннокентьевнаҕа “Мастер народных художественных промыслов РС(Я)” үрдүк анал ааты үөрүүлээх быһыыга-майгыга туттардылар. Тэрээһин улахан оһуохайынан түмүктэннэ.
