Байаан алыптаах тыаһыгар уйдаран
Бу дьыл олунньу ый 17-18 күннэригэр Сунтаар уонна Ньурба улуустарыгар өтөрүнэн буолбатах бастакы улахан байаныыстары уонна ырыаһыттары түмэр-сомоҕолуур «Байаан ырыатыгар куустаран» диэн ырыа бырайыага олус ситиһиилээхтик, далааһыннаахтык, өрө күүрүүлээх хабыллар ытыс тыаһынан бигэргэнэн буолан ааста.
Ырыа бырайыагын Кэбээйиттэн төрүттээх, Сунтаар көмүс күтүөтэ, Саха өрөспүүбүлүкэтин ырыа айаачыларын уонна байаныыстарын, гармонистарын, аккордеонистарын холбоһуктарын чилиэнэ, Кэбээйи улууһун бастакы Лүүчүн нэһилиэгин уонна Сунтаар сэлиэнньэтин Бочуоттаах олохтооҕо, Саха өрөспүүбүлүкэтин култууратын туйгуна билиҥҥитинэн Баҕатаан Саргын Арыылаах Уола-уруккутунан Афанасий Никифоров, кини өртөн туруорбут сыала, баҕарбыт баҕата барҕарда, олоххо киирэн дьон биһирэбилин ылыан ылла, бастакы киэҥ аартыгын арыйда.
Бу буолбут сүҥкэн бырайыакка Бүлүүттэн, Кэбээйиттэн, Сунтаартан, Ньурбаттан уонтан тахса байаныыс, сүүрбэттэн тахса байаан ырыатын сөбүлээн ыллыыр ырыаһыттар кытыннылар, барыта 66 киһи кытынна.
Ырыа түһүлгэтин хаамыытын иилээн-саҕалаан ыытта СӨ социальнай сулууспатын уонна култууратын туйгуна, СӨ «Гражданскай килбиэн» бэлиэ хаһаайына, Сунтаар, Хадан нэһилиэктэрин Бочуоттаах олохтооҕо Людмила Николаевна Пустолякова.
Бастакы күн олоҥхо дойдутугар Сунтаарга киэҥ-куоҥ, сырдык-ыраас Кыыл Уола аатынан норуот айымньытын киинигэр онтон иккис күн күөх Ньурба — киэҥ Ньурба сиригэр поэт Николай Чуор аатынан “Кыталык” култуура киинигэр толору көрөөччүлээх, ыраахтан-чугастан кэлбит ыалдьыттарын сэргэх, иһирэх истээччилэрдээх көрүстэ.
Ыллыыр кумахтаах, үс бүтэй Бүлүү, сыа Бүлүү сириттэн анал ырыа, музыка программалаах ырыаны-тойугу көҕүлүттэн туппут үс байаныыс уолаттар Виктор Платонов, Егор Евдокимов, Иван Туласынов онтон ырыаны олох аргыһа оҥостубут, көмүс күөмэйдээх ырыаһыттарбыт: Иван Данилов, Матрена Сивцева, Людмила Леонтьева, Елена Туласынова олус табыллан сылдьан дьон биһирэбилин, сэҥээриитин ылан, хабыллар ытыс тыаһынан бигэргэтэн ылан кэллибит.
Сунтаар, Ньурба култууратын үлэһиттэрэ кыттааччыларга сахалыы сиэринэн толору минньигэс астаах сандалынан, истиҥ сылаас сыһыанынан көрүстүлэр. Бүлүү кыттааччыларын ааттарыттан барҕа махталбытын тиэрдэбит маннык сахалыы сайаҕастык, сылаастык, истиҥник көрсүбүккүтүгэр.
Бу «Байаан ырыатыгар куустаран» диэн сүҥкэн суолталаах бырайыагы иилээн, саҕалаан тэрийбит талааннаах байаан тутуурдаах, көмүс куоластаах доҕорбутугар Саргын Баҕатааҥҥа Бүлүү айар талааннаахтарын, ырыаһыттарын, байаныыстарын ааттарыттан улахан махталбытын тиэрдэбит.
Бастакы Бүлүү түөлбэтин улахан түһүлгэтэ табыллыбытынан, аартыга аһыллыбытынан!Дом!
