«Аккорд» түмсүү уонна солистар сэмэй ситиһиилэрэ
Сахабыт сиригэр быйылгы дьылы Ил Дархан Ийэ сылынан биллэрбитинэн уонна Өрөспүүбүлүкэбит автономията тэриллибитэ 100 сыллаах үбүлүөйүн чэрчилэринэн элбэх ахсааннаах үтүө тэрээһиннэр ыытылла тураллар. Бүлүү байаныыстара эмиэ бэйэлэрин кылааттарын киллэрсээри «Аккорд» — диэн ааты саҥа сүрэхтэнэн, түмсүү сэмэй хардыытын оҥордо, ол курдук ааспыт ыйга «Ийэ-Олох-Таптал» Өрөспүүбүлүкэтээҕи онлайн күрэххэ кыттан соһуччу Гран-При үрдүк аатын сүгэн күүстэригэр күүс, кынаттарыгар кынат, эрэллэригэр эрэл эбинэн, сүргэлэрэ өрө көтөҕүллэн аны официальнай күрэххэ кыттар баҕаларын толору толордулар.
Бу дьыл ахсынньы ый 3-4 күннэригэр дьолу туойар дьоллоох Дьокуускай куоракка А.Е.Кулаковскай аатынан норуоттар доҕордоһууларын Дьиэтигэр Саха Өрөспүүбүлүкэтигэр 5-с төгүлүн ыытыллар «Сомоҕолоһуу» Өрөспүүбүлүкэтээҕи норуоттар култуураларын сомоҕолуур, тарҕатар, сайыннарар сыаллаах улахан бэстибээл ситиһиилээхтик буолан ааста. Бэстибээли көҕүлээччилэринэн, тэрийээччилэринэн норуоттар икки ардыларынааҕы сыһыаннар Министиэристибэтэ, Саха Өрөспүүбүлүкэтин Ассаблеята уонна А.Е.Кулаковскай аатынан норуоттар доҕордоһууларын Дьиэтэ буоллулар. Бу икки күнү быһа тиргиччи ыытыллыбыт бэстибээлгэ барыта 9 номинацияҕа арааран араас жанрга кыттыыны көрдүлэр, ол курдук: үҥкүү, вокал, уус-уран ааҕыы, инструментальнай толоруу, театральнай искусство, сиэр-туом, айар куттаах дьиэ кэргэн, ураты көрүҥ, мода. Барыта Дьокуускайтан, Мирнэйтэн, Ленскэйтэн, Покровскайтан, Алдантан, Бүлүүттэн, Жатайтан уо.д.а… улуустартан олус бэлэмнээх, кыайыыга дьулуурдаах 500-тэн тахса кыттааччы тоҕуоруһа мустубуттар. Өрөспүүбүлүкэтээҕи 5-с төгүлүн ыытыллар «Сомоҕолоһуу» бэстибээл туруорбут сыалын-соругун көрөөччү иннигэр толору арыйда, бигэргэттэ диэххэ сөп.
Саҥа тэриллибит Бүлүүтээҕи байаныыстар «Аккорд» түмсүүлэрэ бу бэстибээлгэ байыаннай патриотическай попуррины ситиһиилээхтик оонньоон инструментальнай жанрга 1 лауреат үрдүк аатын ылла уонна Гала концертка кыттыыны ылары ситистэ. Вокал жанрыгар Бүлүүтээҕи хаһаак хорун солистара Людмила Тобохова, Наталья Жиркова дуэтынан «Казачья песня» толорон 2 лауреат аатын ыллылар. Маны таһынан ахсынньы ый 3 күнүгэр Жатайга буолбут 3-с төгүлүн ыытыллар «Традиции предков храним!» А.С.Третьяков сырдык кэриэһигэр анаан ыытыллыбыт хаһаактар бэстибээллэригэр байаныыстар «Аккорд» түмсүүлэрэ ситиһиилээхтик кыттан эмиэ 1 лауреат үрдүк аатын ылан эрэллээхтик ситиһиитин өссө төгүл бигэргэттэ. Хаһаак хорун көхтөөх солисткалара Наталья Жиркова 1 дипломант аатын, Людмила Тобохова 3 лауреат аатын, дуэт Н.Жиркова, Л.Тобохова казачай норуодунай ырыаны толорон 1 лауреат үрдүк аатын вокал номинациятыгар ылан үөрүү-көтүү үктэллэнэн тарҕастыбыт.
Түгэнинэн туһанан «Аккорд» уонна Бүлүүтээҕи хаһаактар түмсүүлэрин ааттарыттан барар-кэлэр көлөнөн хааччыйбыт Бүлүү куоратын аҕа баһылыгар Ян Анатольевич Поповка, Н.И.Ылахова аатынан «Алгыс» национальнай культурнай киин директорыгар Алена Павловна Спиридоноваҕа, түргэн сырыылаах суоппарга Михайлов Айал Алексеевичка уонна бэйэлэрин массыыналырынан таспыт Виктор Николаевич Платоновка, Иван Иванович Туласыновка барҕа махтал тылларын тиэрдэбит.
Барыта этэҥҥэ буоллун, кэрэ эйгэ ситимэ быстыбатын, ситиһиилэр өссө да кэлэ турдуннар, дьоллоох буолуҥ, доруобай буолуҥ!
