![](https://vilalgis.ru/wp-content/uploads/2024/04/IMG_3415-1140x1021.jpg)
«Илбис иэйии, айар талаан аартыгынан! »
Муус устар 19 күнүгэр В.О. Каратаев аатынан Олонхо дьиэтигэр Саха Өрөспүүбүлүкэтин култууратын туйгуна, Бүлүүтээҕи И.М.Гоголев-Кындыл аатынан норуодунай театр тутаах артыыската Галина Спиридоновна Алексеева үбүлүөйдээх сааһыгар анаан «Илбис иэйии, айар талаан аартыгынан! » диэн айар киэһэтин тэрийдэ.
![](https://vilalgis.ru/wp-content/uploads/2024/04/IMG_3179-1024x741.jpg)
![](https://vilalgis.ru/wp-content/uploads/2024/04/IMG_3195-1024x755.jpg)
![](https://vilalgis.ru/wp-content/uploads/2024/04/IMG_8021.00_11_31_03.Still043-1024x592.jpg)
![](https://vilalgis.ru/wp-content/uploads/2024/04/IMG_8021.00_15_33_11.Still044-1024x584.jpg)
Галина Спиридоновна 1999 сылтан, үйэ чиэппэрин устата, сүрүн үлэтин таһынан театрга айымньылаахтык үлэлээн кэллэ. Кини үгүстүк көр-күлүү жанрыгар оонньуурун таһынан, трагедийнай, лирическай образтары кыайа –хото тутар. Ол курдук Максим Горькай “Васса Железнова” диэн айымньытыгар Вассаны, Англия улуу патриот дьахтара Кэт Марсдены, Кындыл Уйбаан “Хара кыталык” романыгар Хараанайы, Степан Ефремов “Ини бии” драматыгар Балбаараны, Харысхал “Сэрии тыйыс тыына” драматыгар Огдооччуйаны, Иван Егоров “Хобороос” поэматынан “Хобороос хотойдоро” испэктээххэ 5 оҕотун сүтэрбит Евдокия Малгинаны, Куорсуннаах “Аана дьылҕата” драматынан испэктээххэ Мария Оросинаны, Анемподист Софронов “Олох дьэбэрэтэ” драматынан испэктээххэ Алааппыйаны, онтон да атын улахан оруоллары чаҕылхайдык, итэҕэтиилээхтик оонньоон үгүс дьон биһирэбилин ылбыта. «Бастыҥ дьахтар оруола» диэн үрдүк анал ааты сүкпүтэ.
![](https://vilalgis.ru/wp-content/uploads/2024/04/IMG_3283-1024x809.jpg)
![](https://vilalgis.ru/wp-content/uploads/2024/04/IMG_3333-778x1024.jpg)
Н.И. Ылахова аатынан “Алгыс” национальнай культурнай киин тумус туттар үлэһитин айар дьоро киэһэтин сонуннук толкуйдаан бэлэмнээбит.
![](https://vilalgis.ru/wp-content/uploads/2024/04/IMG_3253-1024x714.jpg)
![](https://vilalgis.ru/wp-content/uploads/2024/04/IMG_3278-1-1024x825.jpg)
![](https://vilalgis.ru/wp-content/uploads/2024/04/IMG_3350-729x1024.jpg)
Истиҥ киэһэҕэ айар куттаах Далбар хотун бэйэтин сүгүрүйээччилэригэр аны биир кистэлэҥ талаана арылынна. Тыл ууһугар умсугуйар, тыл күүһүгэр итэҕэйэр буолан, бэйэтэ айарга холонорун сэгэтэн билиһиннэрдэ уонна «Ахтылҕан», «Кыайыы 75 сыла» диэн хоһооннорун ааҕан иһитиннэрдэ.
![](https://vilalgis.ru/wp-content/uploads/2024/04/IMG_3352-1024x748.jpg)
![](https://vilalgis.ru/wp-content/uploads/2024/04/IMG_3357-1024x754.jpg)
![](https://vilalgis.ru/wp-content/uploads/2024/04/IMG_3379-1024x733.jpg)
Ити курдук, айар үлэни аргыс оҥостон үлэни өрө туппут кэрэ киһи Бүлүүбүт куоратыгар биир бэлиэ, үтүө түгэни тосхойдо.
![](https://vilalgis.ru/wp-content/uploads/2024/04/IMG_3428-1024x671.jpg)
![](https://vilalgis.ru/wp-content/uploads/2024/04/IMG_3459-1024x742.jpg)
![](https://vilalgis.ru/wp-content/uploads/2024/04/IMG_3475-1024x741.jpg)
Сөбүлээн ааҕар бэйиэтим, суруйааччы Николай Чуор хоһоонун тыллара хайдах эрэ, бу киэһэҕэ анаммыт курдуктар. Галина Спиридоновнаҕа махтанан уонна бары үтүөнү баҕаран туран, ону салайдаҕым буоллун:
Кэрэҕэ алтыһар үчүгэй даҕаны
Кэрэни кэрэхсиир оо, күндү даҕаны,
Кэрэттэн үөрэрбит дьикти да үчүгэй
Кэрэлиин ыллаһар дууһабар күөрэгэй.
Кэрэни кэрэхсиир үтүөкэн киһиэхэ
Күн өрүү сырдыктык, сылаастык мичээрдин,
Мэлдьитин, өрүүтүн сүрэххэр
Дууһаҕар күөрэгэй ыллаатын !
Луиза Кононова, киин библиотека кыраайы үөрэтиигэ кылаабынай библиотекара
![](https://vilalgis.ru/wp-content/uploads/2024/04/IMG_3849-75x75.jpg)
![](https://vilalgis.ru/wp-content/uploads/2024/04/photo1713603756-12-75x75.jpeg)