Уостан түспэт ырыалар
Бу дьыл тохсунньу ый 13 күнүгэр дьоллоох Дьокуускай куоракка Саха өрөспүүбүлүкэтин мелодистарын, ырыа айааччыларын умнуллубат, уостан түспэт ырыаларын улахан түһүлгэтэ толору истиҥ-иһирэх, сэргэх көрөөччүлэрдээх оҕо искусствотын дыбарыаһыгар ситиһиилээхтик буолан ааста. Ырыа проегын автора Саха өрөспүүбүлүкэтин култууратын үтүөлээх үлэһитэ, Саха өрөспүүбүлүкэтин ырыа айааччылар сойууһун солбуйар бэрэсэдээтэлэ, «Истиий дуу, байааным ырыатын «Икки сүрэх иэйиитэ», «Тус хоту» ырыа проектарын автора, биллэр ырыа айааччы Степан Иванович Васильев буолар.
Ырыа түһүлгэтин хаамыытын сатабыллаахтык, иилээн-саҕалаан, ырыа айааччылар биллэр аймньыларын көрөөччүлэргэ-истээччилэргэ чугастык билиһиннэрэн, олус сэргэхтик, доргуччу диктор Алексей Константинов үрдүк таһымҥа ыытта. Проекка бииртэн-биир биллэр мелодистар араас сылларга ылламмыт, дьон-сэргэ уоһуттан түһэрбэккэ ыллыы сылдьар ырыаларын толордулар.
Ол курдук байаан дьоҕуһуолунан Н.Устинов тыл., мел. «Дьол вальса» ырыанан бу кэлбит саҥа сылынан, саҥа дьолунан эҕэрдэлээн туран биһиги бары сөбүлүүр ырыаһыппыт Николай Спиридонов концеры саҕалаата.Көрөөччүлэр бииртэн-биир уостан түспэт, биллэр-көстөр ырыалаах кыттааччыны хабыллар ытыс тыаһынан көрүстүлэр. Бу ырыа түһүлгэтигэр кыттыыны ыллылар биллэр-көстөр, ааттаах-суоллаах мелодистар, ырыаһыттар ол курдук: Владимир Заболоцкай, Степан Васильев,Владимир Индигирскай, Исай Брызгалов, Владимир Колтовской, Иван Туласынов, Николай Андросов, Иван Иванов, Андрей Старков Василий Петухов. Ырыаһыттар Варя Аманатова, Константин Степанов, кэргэннии Антонина, Иван Прибылыхтар, Елена Ильина –Намчы, Сардаана Трофимова уо.д.а…
Бу ырыа проегар кырылас ыллыыр кумахтардаах Бүлүү сириттэн Елена уонна Иван Туласыновтар ситиһиилээхтик кыттыыны ыллылар, кинилэр 1979 сыллаахха Томскай куоракка устудьуоннуу сылдьан суруйбут бастакы ырыаларын иккиэн дуэтынан ыллаан автор тыл.мел. «Таптаатым музыка тойугун» уонна 1987 c. айыллыбыт «Төрөөбүт күн!» ырыаларын көрөөччүлэригэр утары ууннулар.
Уостан түспэт ырыалар проега салҕана туруохтун, үйэлээх ырыалар ыллана, дуораһыйа турдуннар.
