Үгүлээккэ ырыа дьоро киэһэтэ

Бу дьыл ахсынньы ый 16 күнүгэр Бүлүү улууһугар уһук сытар, үгүс үтүө үгэстэрдээх Үгүлээт сиригэр уонна күүтүүлээх бастакы Күүлэт нэһилиэгин Саха өрөспүүбүлүкэтин уонна култууратын туйгуна, сцена бэтэрээнэ, элбэх ырыа күрэҕин кыайыылааҕа, лауреата Бүлүүлэр киэн туттар көмүс куоластаах Матрена Петровна Сивцева өрөгөйдөөх үбүлүөйүгэр анаан уонна ийэтин 100 — сылын бэлиэтиир «Ийэ — иэйэр кут ымыыта» — диэн программанан ахтылҕаннаах дойдутугар, истиҥ — иһирэх истээччилэригэр, чугас дьонугар — сэргэтигэр ырыа, музыка куттаах байаан тутуурдаах чугас доҕотторунуун Саха Өрөспүүбүлүкэтин култууратын үтүөлээх үлэһиттэрэ: Николай Дмитриевич Стручков, Иван Иванович Туласынов, Саха өрөспүүбүлүкэтин култууратын туйгуна Елена Николаевна Туласынова, төрөппүт уола Айсен Дмитриевич уонна Матрена Петровна иитиллээччитэ инникигэ кэскиллээх Алик Алексеев кыттыылаах бэйэтэ туһунан тыыннаах байаанынан кэнсиэр Сайдам» — диэн саҥалыы тутуулаах сырдык, сылаас култуура киинигэр дьон биһирэбилин, дохсун ытыс тыаһынан доҕуһуоллатан ситиһиилээхтик буолан ааста. Кэнсиэртэн киирбит үп СВО-ҕа ананна.

Ол курдук Матрена Петровна бу истиҥ кэнсиэрин оҕо сааһа ааспыт ахтылҕаннаах дойдутугар, дьонугар-сэргэтигэр анаан «Саныыбын төрөөбүт алааспын»- диэн ырыатынан саҕаланна. Матрена Петровна олус истиҥник, долгутуулаахтык дойдутун, дьоннорун үтүө кэрэ үгэстэрин, оҕо сааһын ахтан-санаан сатабыллаахтык кэпсии-кэпсии ийэҕэ, аҕаҕа, оҕоҕо, тапталга анаммыт ырыалар ылланнылар. Дьиэ кэргэҥҥэ ырыа утума быстыбат ситимин бигэргэтэ төрөппүт уола Айсен Сивцев бэйэтин ырыаҕа дьоҕурун көрдөрөн биир дойдулаахтарын биһирэбиллэрин ылла. Иитиллээччи Алик Алексеев сыанаттан доргуччу чуор, ыраас куолаһынан дуораһыта ыллаан көрөөччүлэр хабыллар ытыс тыаһынан көрүстүлэр.

Маны таһынан ырыанан бииргэ алтыһар доҕотторо Елена Иван Туласыновтар бииртэн биир үтүө-кэрэ мелодиялаах ырыалары сыыйа тартылар.
Матрена Петровна айылҕаттан бэриллибит кэрэ куоластаах, сырдык эйгэҕэ ис сүрэҕиттэн бэриниилээх, дьоҕурдаах Далбар Хотун буолар, кини Бүлүүтээҕи Герой Н.С.Степанов аатына 3 нүөмэрдээх оскуолаҕа учууталлыырын таһынан, Бүлүү улууһун айар талааннаахтарын, улуус музыкальнай историятын кэпсиир-ипсиир экспонаттары, материаллары мунньан музыкаҕа анаммыт музей лабораторияны үлэлэтэр.
Матрена Петровна саха ырыатын киэҥ эйгэҕэ таһаарарга бэйэтин сэмэй кылаатын киллэрсэр, музыкаҕа сыһыаннаах материаллары хомуйар, ырытар, мелодистар ырыаларын киэҥ эйгэҕэ тарҕатааччы буолар, кини Бүлүү улууһугар, куоратыгар ыытыллар араас таһымнаах култуурунай тэрээһиннэр активнай кыттыылааҕа.

Түгэнинэн туһанан Үгүлээт нэһилиэгин администрациятыгар кэлэ-бара сырыыбытын транспорынан көмөлөспүттэригэр, чуолаан баһылык Октябрь Иванович Лукиҥҥа, баһылык солбуйааччытыгар Федоров Виктор Витальевич Федоровка, кулууп дириэктэригэр Яковлева Саргылаана Егоровнаҕа, художественнай салайааччыга Алексеева Дьулустаана Реворьевнаҕа, Гаврильев Геннадий Петровичка, Васильева Розалия Львовнаҕа, Иванова Мария Михайловнаҕа олус сылаастык, остуол тардан көрсүбүттэригэр уонна сымнаҕас айаннаах суоппарбытыгар Семенов Виталий Анатольевичка улахан махталбытын биллэрэбит.

Барыгытын кэлэн иһэр Саҥа дьылынан! Дьоллоох буолуҥ!