«Ыллаа-туой, байааным»

Ытык Күөлгэ Саха Өрөспүүбүлүкэтин норуотун хаһаайыстыбатын үтүөлээх үлэһитин, култууратын, муниципальнай сулууспатын туйгуна, Томпо улууһун Байаҕантай уонна Таатта улууһун Октябрьскай нэһилиэктэрин бочуоттаах олохтооҕо ааттары Орто дойдуга олорор кэмигэр сүкпүт Николай Тулааһынап төрөөбүтэ 70 сылыгар анаммыт өрөспүүбүлүкэтээҕи «Ыллаа-туой, байааным» диэн баянистар, аккордеонистар, гармонистар күрэхтэһиилэрэ бу дьыл кулун тутар 19 күнүгэр ситиһиилээхтик буолан ааста.

Байаан дьүрүскэн кэрэ тыаһыгар уйдаран 100 –тэн тахса кыттааччы араас улуустартан: Тааттаттан, Чурапчыттан, Мэҥэ Хаҥаластан, Намтан, Хаҥаластан, Бүлүүттэн, Дьокуускай куораттан, орто, үрдүк анал үөрэх кыһаларыттан уонна искусство оскуолатын элбэх иитиллээччилэрэ уонна байааны олох аргыһа оҥостубут любитель байаныыстар кытыннылар.Барыта 104 кыттааччы, 98 байааҥҥа күрэхтэһээччи, 6 чулуу ырыаһыттар ол иһигэр профессионал байаныыстар 11, любитель байаныыстар 9, оҕолор 26, ансаамбыллар 10.

Ыллыыр кумахтаах Тойон, Сыа Бүлүү сириттэн 6 киһилээх делегация: «Аккорд» байаныыстар бөлөхтөрө:

Виктор Платонов, Геннадий Егоров, Алексей Иванов, Елена, Иван Туласыновтар уонна ымыылаах ырыаһыт, Аркадий Алексеев ырыаҕа күрэҕин «Бастыҥ ырыаһыта» номинация кыайыылааҕа Бөтүҥтэн көмүс куоластаах Николай Иванов олус ситиһиилээхтик кытыннылар.

Ол курдук любитель байаныыстар икки ардыларыгар күрэххэ Гран-При хаһаайынынан Саха Өрөспүүбүлүкэтин үтүөлээх үлэһитэ, Н.И.Ылахова аатынан «Алгыс» национальнай култуурунай киин үлэһитэ Иван Туласынов, убаһа бирииһинэн наҕараадаланна.

3 истиэпэннээх Лауреат аатын Гражданскай авиация үтүөлээх үлэһитэ, байаныыс, мелодист Виктор Платонов сыаналаах бирииһинэн наҕараадаланна уонна Бүлүүтээҕи байаныыстар «Аккорд» бөлөҕө 9 профессионал байаныыстар ансаамбылларын кытта тэҥҥэ киирсэн 1 истиэпэннээх Дипломант үрдүк аатын ылан үөрүүлэрэ-көтүүлэрэ үксээтэ.