«Тоҕус оһуордаах түһүлгэ»

Аанныыр Ийэ дойдубар
Кэлэр кэлэр кэнчээри
Ыччаттарбар даҕаны
Дьоллоох олоҕу туойуоҕум
Аанныыр Ийэ дойдубар
Көтүппэхтээн сылдьыаҕым
Сарсын сарсын сарсыарда…
С.А.Зверев — Кыыл Уола.

Сунтаар — Олоҥхо дойдутугар норуот уус — уран айымньыта уутуйан үөскээбит ытык сиригэр С.А.Зверев — Кыыл Уолун анабыл күнүгэр саха дьонун түмэр, айылҕаттан бэриллибит дьоҕурун сайыннарар, саха төрүт култуурата, уус — уран айымньыта билиҥҥи дьалхааннаах олоххо харыстанан хааларыгар, үйэтитиллэригэр биир сүрүннүүр хамсааһын «Тоҕус оһуордаах түһүлгэ» диэн ааттаах норуот уус — уран айымньытын түһүлгэтэ Муус устар 8 — 9 күннэригэр Сунтаарга буолан ааста.

«Тоҕус оһуордаах түһүлгэҕэ» саха сириттэн то5ус улуустан тоҕус көрүҥҥэ күөн күрэс ыытылынна.

Бүлүү улууһуттан кыттыыны ылла: В.О.Каратаев аатынан олоҥхоһуттар уонна тойуксуттар норуодунай кэллэктиибэ, салайааччы Иванова Светлана Тарасовна , СӨ култууратын туйгуна.

Көрүү күрэс түмүгүнэн оһуокайга Светлана Петровна Харлампьева, Сэмэн Мэҥкэр Хабырыыл Уола, Каролина Петровна Харлампьева бастыҥ оһуокайдьыттар анал ааттарын ыллылар. Кузнецова Лидия Николаевна «Саҥа саҕалааччы Олоҥхоһут» анал ааты ылла.

Бүлүү улууһуттан уопсайа 43 киһи баран кыттыыны ыллылар.