“Сүдү киһибит сүдү талааныгар сүгүрүйэн”

ССРС култууратын туйгуна, РСФСР тыатын хаһаайыстыбатын туйгуна, Саха АССР култууратын Үтүөлээх үлэһитэ, ССРС географическай обществотын чилиэнэ, фенолог корреспондена, билгэһит, “Саха литератора” ассоциация чилиэнэ Николай Лукич Игнатьев-Билгэ 95 сылыгар аналлаах сэргэх тэрээһин кини олоро сылдьыбыт дьиэтигэр сибэккии дьөрбөтө ууруутуттан саҕаланна.



Бүлүүгэ үлэлиир сылларыгар бииргэ алтыспыт дьонноро Бүлүү куоратын бочуоттаах олохтооҕо, Алгысчыт Петрова Ефросиния Дмитриевна, култуура управлениятын начальнигынан өр сылларга үлэлээбит Саха Республикатын Үтүөлээх үлэһитэ Дашевская Валентина Петровна, Н.И. Ылахова аатынан “Алгыс” НКК уус-уран самодеятельнаһын салайааччыта, Саха Республикатын култууратын Үтүөлээх үлэһитэ Евсеева Августина Платоновна Николай Лукич Игнатьев – Билгэ Бүлүү улууһун култууратын сайдыытыгар элбэх сүнкэн үлэни оҥорбутун бэлиэтээн эттилэр. Хомустаах эбэҕэ ыһыахтыыр сири түстэспит киһи буоларын бигэргэттилэр. Ол курдук олук уурсан күн бүгүнҥэ дылы Бүлүүлэр Ыһыахтыыр сирдээхпит.
Тыа хаһаайыстыбатын сайдыытыгар элбэх үлэни саҥа соруктары киллэрбитин сырдатта бииргэ алтыһан үлэлээбит тыа хаһаайыстыбатын Үтүөлээх үлэһитэ Афанасьев Владимир Григорьевич.
Ийэ айылҕабытын чөл олохтоох буоларын туһугар элбэх үлэни оҥорон барбыта. Ол курдук Бүлүү экологиятын, айылҕатын харыстабылын туһугар Михайлов Нестер Сергеевичтыын 1996 сыллаахха Күүлэт сиригэр ракета тобоҕо түһэрин күүстээх үлэни ыытан тохтоппуттара.
Дьокуускай куораттан общественнай эколог Иван Семенович Бурцев, экологияны харыстааһынҥа үлэлэһэ сылдьар түөрт Бүлүү бөлөх улуустарын общественнай түмсүү салайааччыта Еремей Константинович Чиряев Н.Л.Игнатьев-Билгэ экология тупсарын туһугар киллэрбит кылаатын дьоҥҥо-сэргэҕэ тиэртилэр.
Бүлүү куорат дьаһалтатын депутаттарын сэбиэтин председателэ Софья Мартыновна Саввинова кинилэр бииргэ дьиэ кэргэнинэн алтыһар буоланнар үтүө өйдөбүл хаалбытын санаан ааста.
Бүлүүтээҕи 3 нүөмэрдээх окуола учууталынан үлэлээбит Розалия Иннокентьевна Иванова кылгас кэмҥэ да буоллар алтыһан кини оҕолорго анаан суруйбут кэпсээнин, хоһооннорун ангийский тылга переводтаан биэрбитин туһунан кэпсээтэ, Мэҥэ Хаҥалас Төхтөрүттэн биир дойдулаахтара бу тэрээһинҥэ кыттыһаннар үөрүүлэрин үллэһиннилэр.
Тэрээһини истиҥ сүрэхтэн тэрийэн ыыттылар “Албан” аат музей үлэһитэ краевед Клара Егоровна Саввинова уонна Н. Г. Чернышевскай аатынан Бүлүүтээҕи профессионально педагогическай колледж преподователя Ксения Максимовна Семенова уонна Н.И. Ылахова аатынан “Алгыс” НКК үлэһитэ Светлана Тарасовна Иванова. Н.Л Игнатьев муспут архыыбын уонна олохтоох библиотека быыстапката турда. Хас биирдии киһи таһаарбахха хаалбыт айымньылара тахсарыгар баҕа санааларын эттилэр.
Дмитрий Тарасович Иванов устубут видеотын көрөн ааспыты ахтыһан туоһу устуу баарын дьиҥнээх олоххо буолбут түгэннэр өссө чиҥэтэн биэрдилэр. Сүдү киһи аата үйэлэргэ умнуллубатын, суруйан хаалларбыт айымнньылара күн сирин көрөрүгэр баҕарыаҕыҥ.

Добавить комментарий

Ваш адрес email не будет опубликован. Обязательные поля помечены *