«Тиһэх Чуорааҥҥа» оһуокай түһүлгэтэ

Бүгүн ыам ыйын 24 күнүгэр Бүлүү куоратын выпускниктарыгар кэтэһиилээх «Тиһэх чуораан» бырааһынньыгын күнэ.

Бүгүҥҥү чуораан олох атын, тиһэх оскуолатааҕы чуораан. Кини эһиги оҕо сааскытын уонна инники олоххутун ситимниир суолталаах.

Хас биирдиигитигэр эргиллибэт күндү өйдөбүл буолан, көмүс чуораанынан чугдаара лыҥкынаан, оонньуу-көр аргыстаах оскуолатааҕы, оҕо эрдэҕинээҕи сылларгытын санатан ааһыа.

Н.И.Ылахова аатынан «Алгыс»НКК иһинэн үлэлиир «Бүлүү долгуннара»норуодунай кэллэктиип, «Үрүччэ»үҥкүү ансаамбылын, ааҕыы литературнай кружок оҕолоругар бу күн тиһэх чуорааннара чугдаарда.

Бу бэлиэ күн, оҕолорбут В.О.Каратаев аатынан олоҥхоһуттар уонна тойуксуттар норуодунай кэллэктииптэрэ иилээн-саҕалаан ыыппыт оһуокай түһүлгэтигэр оһуокайы таһаардылар. Ол курдук Старостина-Дранаева Валерия, Шумилов Павел, Милена Максимова.

Баҕарыа этибит бары оскуоланы бүтэрбит оҕолорбутугар, бука барыгытыгар дьолу, доруобуйаны, кэрэттэн кэрэни, сырдыктан сырдыгы, ситиһиини, табыллыыны. Экзаменнаргытын ситиһиилээхтик туттаран баҕарбыт идэҕитигэр үөрэххэ киирэн ситиһиилээх, ааккытын ааттатар дьоһун дьон буоларгытыгар !