Петр Хрисанфович Староватов 150 сааһыгар аналлаах кини чинчийбит сирдэринэн экскурсия

От ыйын 14-16 күннэригэр Сунтаар улууһугар П. Х. Староватов төрөөбүтэ 150 сааһыгар аналлаах кини чинчийбит, үлэлээбит сирдэринэн экскурсия ыытылынна. Пётр Хрисанфович бастакы кыраайы үөрэтиини саҕалаабыт, тарҕаппыт киһиннэн биллэр. Алмаас баар диэн аан бастакыннан биллэрбит сүдү киһибит буолар. 

Экскурсия бастакы күнүгэр Ньурба куоратыгар баар К. Д. Уткин аатынан музейга Петр Хрисанфовичка аналлаах стендэ баарын сэргии көрдүбүт. 

Алта сыл үлэлээбит Элгээйитигэр саҥа таас орто оскуолата кини аатын сүгэр.

Б. Н. Андреев төрүттээбит музейыгар баай, сэдэх экспонаттарын көрөн сөхтүбүт.

Сунтаарга чуолаан Тэҥкэ ураты айылҕалаах сирдэринэн сырыттыбыт. Тэҥкэҕэ  араас эмтээх үүнээйилэр туһаларын үөрэттибит. Айылҕа кумах, таас булкаастаах хайаларыгар үөһээ таҕыстыбыт.

«Абааһы балаҕана» диэн хайа хаспаҕар киирэ сырыттыбыт. 

Үөһэттэн күрүлэччи түһэр  ып- ыраас уулаах күрүлгэни кэрэхсээн көрдүбүт. Бүлүү Эбэ кытылыгар П. Х. Староватов аан бастакыннан булан, үөрэтэн дьоҥҥо- сэргэҕэ сферолит диэн ураты сэдэх төгүрүк  таастары элбэҕи буллубут, көрдүбүт. 

П. Х. Староватов Бүлүү сирин, сиртэн хостонор баайын чинчийэн элбэх ыстатыйалары араас хаһыаттарга, сурунаалларга таһаартарбыта, киэҥ сэҥээриини ылан элбэх чинчийэр экспедициялар ыытыллыбыттара.

Кэмпэндээйигэ «Мохсоҕоллоох» диэн аатырар күөл эмтээх уу, түгэҕэр дьон эмтэнэр бадараана баарын П.Х. Староватов чинчийбитэ.

Кэмпэндээйитээҕи туус собуотугар сылдьан, сир анныттан тахсар  туустаах ууну хайдах туһаҕа таһааралларын олус интэриэһиргээн көрдүбүт, иһиттибит.

Бу курдук П.Х Староватов 150 сааһыгар аналлаах экскурсияҕа Бүлүүтээҕи краеведческай музей тэрийбит тэрээһинигэр сылдьыһан, элбэҕи билэн, көрөн, сэргээн кэллибит.