Бүлүү куоратыгар бастакы Республиканскай “Муус оҥоһуктар” күрэҕин арыллыыта

Россияҕа “Дьиэ кэргэн”, Саха сиригэр “Оҕо саас”, Бүлүү куората 390 сылларыгар аналлаах “Оруктаах” муус пааркатыгар, муус оҥоһуктарга бастакы республиканскай күрэх кулун тутар 16 күнүгэр үөрүүлээх арыллыыта буолан ааста.

Күрэххэ Сахабыт сирин араас улуустарыттан: Хаҥалас, Нам, Ньурба, Таатта, Дьокуускай уонна Бүлүү куоратыттан икки хамаанда күөн күрэскэ кыттыыны ыла кэллилэр.

Ыалдьыттары алаадьынан күндүлээн Алгыс тылынан Ньургуйаана Капитоновна Саввинова алҕаата.

Дьүүллүүр сүбэҕэ: Бүлүү куорат муниципальнай тэриллии баһылыгын солбуйааччыта Николай Варламович Иванов, Бүлүү улууһун норуотун маастара Лыткин Василий Иосипович, Бүлүү куорат муниципальнай тэриллии физкультураҕа уонна спортка управлениятын начальнигын солбуйааччыта Василий Валерьевич Пестряков, М.Н.Жирков аатынан Бүлүүтээҕи музыкальнай оскуола оҕо ойуулуур-дьүһүннүүр искусствотын филиалын сэбиэдиссэйэ Афанасий Егорович Иванов

уонна Саха Республикатын норуотун маастара, 2014 сыллаахха Аляскаҕа ыытыллыбыт мууһунан оҥоһуктар Аан дойдутааҕы чемпионатын кыайыылааҕа Николай Николаевич Степанов.

Муус оҥоһуктар икки күн оҥоһуллуохтара. Бүлүү куоратын олохтоохторо уонна ыалдьыттара муус оҥоһуктар хайдах оҥоһуллалларын көрө “Оруктаах” муус пааркатыгар ыҥырабыт.

Сарсыҥҥы түмүктүүр тэрээһиҥҥэ кэлиҥ, сылдьыҥ, муус оҥоһуктарга хаартыскаҕа түһүҥ диэн ыҥырабыт.

Добавить комментарий

Ваш адрес email не будет опубликован. Обязательные поля помечены *