«Күҥҥэ көрбүт аргыһым-көмүс тимэх байааным…»
Бу дьыл муус устар 22 күнүгэр ыаллыы сытар Үөһээ-Бүлүү улууһун Нам нэһилиэгэр Саха АССР култууратын үтүөлээх үлэһитэ, самодеятельнай композитор, Нам, Балаҕаннаах нэһилиэктэрин бочуоттаах олохтооҕо Мария Игнатьевна Константинова-эдьиий Морууса төрөөбүтэ 95 сылыгар аналлаах «Күҥҥэ көрбүт аргыһым-көмүс тимэх байааным…» бастакы байаанынан ырыа күрэҕэ буолан ааста.
Тэрийээччилэр: «Нам нэһилиэгэ» тыа сирин түөлбэтин дьаһалтата, «Култуура уонна духовнай сайдыы департамена МКТ, Үөһээ-Бүлүүтээҕи норуот айымнньытын Киинэ» МАТ, Үөдүгэйдээҕи култуура Киинэ, Үөһээ-Бүлүүтээҕи Н.И.Бойлохов аатынан Оҕо Искусство Оскуолата, «Намнааҕы култуура сынньалаҥ тэрилтэтэ».
Бу ырыа күрэһин проегар барыта 95 кыттааччы: Бүлүүттэн, Үөһээ-Бүлүүттэн кыайыыга дьулуурдаах ырыаһыттар тоҕуоруһа муһуннулар. Кыттааччылар байаан доҕуһуолунан Мария Игнатьевна суруйан хаалларбыт уостан түспэт ырыаларын истиҥник-иһирэхтик толордулар. Улуустааҕы бастакы төгүлүн ыытыллар ырыа күрэһэ туруорбут сыалын-соругун ситистэ.
Ырыа күрэһин дьүүллүүр сүбэҕэ үлэлээтилэр: бэрэсэдээтэлинэн Саха өрөспүүбүлүкэтин култууратын үтүөлээх үлэһитэ Абрахова Виктория Николаевна, Саха өрөспүүбүлүкэтин култууратын үтүөлээх үлэһитэ, Үөһээ-Бүлүү уонна Үөдэгэй нэһилиэгин Бочуоттаах олохтооҕо Иванова-Дмитриева Анна Петровна, Саха өрөспүүбүлүкэтин култууратын үтүөлээх үлэһитэ, Үөһээ-Бүлүү улууһун Бочуоттаах олохтооҕо «Чолбон” рок группа солиһа Васильев Юрий Алексеевич, Саха өрөспүүбүлүкэтин култууратын туйгуна, Үөһээ-Бүлүү улууһун Н.И.Бойлохов аатынан Оҕо Искусство оскуолатын преподавателэ Спиридонова Татьяна Даниловна, Намнааҕы «Кэнчээри” оҕо уһуйаанын музыкаҕа салайааччыта, «Намыына» ырыа ансаамбылын салайааччыта Петрова Анна Сергеевна.
Күрэс икки сүүмэрдиир түһүмэхтэн турда, бастакы сүүмэрдиир түһүмэх Мария Игнатьевна Константинова айбыт-туппут ырыаларыттан саҕаланна, иккис түһүмэххэ көҥүл тиэмэҕэ буолла. Кыттааччылар кыайыыга дьулуурдаах, бэлэмнээх кэлбиттэрэ өтө көстөр, бииртэн биир кэрэ куоластаах ырыаһыттар, бөлөҕүнэн толорооччулар тахсан эдьиий Моруусаны санатан, кини айан хаалларбыт ырыаларын ис сүрэхтэриттэн толордулар. Ордук табыллыбыт ырыалара: “Оо, быраас барахсан”, “Чэ, чэ…”, “Байааным” хастыыта да хатыланан ылланнылар. Ырыа күрэһин түһүмэхтэрин кэннэ тэрийээччилэр соһуччу хотойор, минньигэс сахалыы астаах улахан сандалы тэрийэн, бары кыттааччыларын ыҥыран күндүлээтилэр.
Бу бастакы ыытыллар «Күҥҥэ көрбүт аргыһым-көмүс тимэх байааным…» күрэскэ Бүлүү куораттан Саха өрөспүүбүлүкэтин култууратын туйгуна, сцена бэтэрээнэ Леонтьева Людмила Николаевна кыттан «Эриэккэс куолас» анал ааты ылан сыаналаах бирииһинэн наҕараадаланна.
Г.И.Чиряев аатынан оскуола учуутала Семенова Камилла Борисовна. Бастакы Лауреат аатын ылыан ылла уонна 30000 сертификатынан наҕараадаланна.
Маны таһынан Бүлүүтээҕи Н.Г.Чернышевскай аатынан колледж «Дэгэт» устудьуоннар ырыа ансаамбыла-салайааччы Саха өрөспүүбүлүкэтин үөрэҕириитин туйгуна Римма Нестерева 3 истиэпэннээх Дипломан аатын ылан олус үөрдүлэр- көттүлэр уонна Нам нэһилиэгин туруорбут 20000 харчынан сертификатын туттулар.
Бастыҥ эдьиий Морууса ырыатынн толорооччу-«Көмүлүөк» түмсүү
3 Дипломан – Н.Г.Чернышевскай аатынан Бүлүүтээҕи пед.колледж Бүлүү к.
2 Дипломан – Владимир Чуручанов Үөһээ-Бүлүү
1 Дипломан – Надежда Семенова Үөһээ-Бүлүү
3 Лауреат – «Сиккиэр» ырыа ансаамбыла Үөһээ-Бүлүү
2 Лауреат – «Дьиэрэй» ырыа ансаамбыла Үөһээ-Бүлүү
⦁ Лауреат – Камилла Семенова Бүлүү куората
Гран-При – «Үрдэл» ырыа ансаамбыла Үөһээ-Бүлүү
Ырыа күрэһин үөрүүлээх уонна кэтэһиилээх түмүгэ тахсан кыайыылаахтар сүргэлэрэ көтөҕүллэн, үөрэн-көтөн, өйдөбүнньук хаартыскаҕа түһэн астынан тарҕастылар. Бу күөн күрэс мугутуур кыайыылааҕа Үөһээ-Бүлүү улууһуттан «Үрдэл» ырыа ансаамбыла, салайааччы Саха өрөспүүбүлүкэтин култууратын туйгуна Ньургустаана Бугулова 50000 солк. дьаһалта туруорбут сертификатынан, биирдиилээн толорооччуларга Нам нэһилиэгиттэн Розалия Тарасова 50000 наҕараадаланнылыр. Алыптаах лыҥкынас дорҕоонноох байаан ырыата сүрэхтэри угуттуу, үөрдэ турдун, Мария Игнатьевна ырыалара уостан түспэккэ ыллана, тарҕана турдуннар!
