Алгысчыт Афанасий Семенович Федоровтыын көрсүһүү

Муус устар 3 күнүгэр “Алгыс” национальнай культурнай киин ыалдьытынан Российскай Федерация култууратын үтүөлээх үлэһитэ, Саха Өрөспүүбүлүкэтин үтүөлээх артыыһа, А.Е. Кулаковскай аатынан Судаарыстыбаннай бириэмийэ лауреата, Дьокуускай куорат, Уус-Алдан улууһун, Дүпсүн нэһилиэгин бочуоттаах олохтооҕо Афанасий Семенович Федоров ыалдьыттаата. Көрсүһүүгэ алгысчыт Афанасий Семенович кэлбит дьону аал уоту оттон, айах тутан алгыс сиэрин-туомун толордо.

Афанасий Семенович саха итэҕэлин бар дьоҥҥо тарҕата сылдьар алгысчыт, уһуйаан буоларынан, сиэр-туом тула кэпсэтиини уонна санаа атастаһыы түһүлгэтин тэрийдэ.

Манна аҕам саастаах дьоннор, бэтэрээн үлэһиттэр саха тылын учуутала Павлина Даниловна Иванова, култуура үлэһитэ Марфа Спиридоновна Васильева, доруобуйа харыстабылын бэтэрээнэ Светлана Павловна Калачикова уо.д.а. биир санааҕа түмүллэн кэпсэтиигэ кытыннылар.

Биһиги сахалар итэҕэлбит сайдарын, эдэр көлүөнэ ыччаттарга тарҕатарбыт туһугар, хас биирдии ыал сөптөөх хайысханы тутуһуоҕуҥ.

Өбүгэлэрбит илдьэ кэлбит сиэрдэрин-туомнарын, итэҕэллэрин харыстаан үйэтитэ, тарҕата туруоҕуҥ.