Роман Николаев аатынан спортивнай искибиэр арыллыыта

Роман Николаев кулун тутар 4 күнүгэр 1983 сыллаахха Бүлүү Кыргыдайыгар күн сирин көрбүтэ. Бүлүү 2,1-кы нүөмэрдээх оскуолаларыгар, тыа хаһаайыстыбатын Академиятын юридическай салаатыгар үөрэммитэ, Саха Өрөспүүбүлүкэтин Хапсаҕайга спордун маастара, 2000 сыллаахха ыытыллыбыт норуоттар икки ардыларынааҕы Азия оҕолорун 2-ис оонньууларын кыттыылааҕа, Саха Өрөспүүбүлүкэтин бастакы Президенин Михаил Ефимович Николаев аатынан стипендиата, Өрөспүүбүлүкэ уонна Россия араас таһымнаах күрэхтэһиилэр хас да төгүллээх кыайыылааҕа, призера.

Бүлүү куоратын 390 сыллаах үбүлүйүөйүгэр, Роман Николаев сырдык кэриэһигэр, Бүлүү куорат уокуруктарын икки ардыларыгар ыытыллыбыт спартакиада түмүгүнэн «Оруктаах» хамаандата кыайан, спортивнай площадка тутулунна.

Искибиэр тутулларыгар бастакынан сүрүн идеятын киллэрбит Роман оҕо сааһын доҕоро, СК «Саха Билдинг» генеральнай директора Владислав Николаевич Васильев буолар.

Бу күн искибиэри тутарга күүс көмө, өйөбүл буолбут дьоннорго Роман Николаев төрөппүттэрэ махтал тылларын тиэртилэр.

Искибиэр арыллыытын ыалдьыттарынан буоллулар Бүлүү улууһун баһылыга Сергей Николаевич Винокуров, Бүлүү куорат муниципальнай тэриллии баһылыгын солбуйааччыта Николай Варламович Иванов, Кыргыдай нэһилиэгин баһылыга Василий Егорович Александров,

Саха Өрөспүүбүлүкэтин успуордун министирин солбуйааччыта Аида Константиновна Антонова, спортивнай комментатор Александр Васильевич-Көрдүгэн уонна бииргэ үөрэммит, бииргэ тустубут атастара, доҕотторо.

Хапсаҕайга Саха сирин спордун маастара Роман Николаев аатынан искибиэр Бүлүү куоратын биир кэрэ, ыраас, мэлдьи оҕо-аймах, эдэр ыччат сөбүлээн дьарыктанар миэстэтинэн буоллун!