![](https://vilalgis.ru/wp-content/uploads/2023/05/Без-имени-1-1140x659.jpg)
«Ийээ, мин хайаан да эргиллиэм…»
“Алгыс” сынньалаҥ киинигэр Улуу Кыайыы күнүгэр кырыыстаах сэриигэ сураҕа суох сүппүт хаарыан дьоммут сырдык кэриэстэригэр анаммыт ураты ис хоһоонноох театрализованнай композиция туруорулунна. Куруук кэтэһиилээх өрөспүүбүлүкэҕэ биллэр ааттаах-суоллаах ытыктыыр театрбыт уонна СӨ култууратын үтүөлээх үлэһитэ, ытыктабыллаах Владимир Васильев аатынан народнай хор, театр кэскиллээх эдэр артыыстара — Донской аатынан оскуола үөрэнээччилэрэ, кыра сааһыттан дьон хараҕын уутун таһаарар гына оонньуур чаҕылхай талаан Айвар Прокопьев, хотунан-соҕуруунан, өрөспүүбүлүкэҕэ биллэр Бүлүү сулустара — “Бүлүү долгуннара” үҥкүү народнай ансаамбыла уонна «Алгыс» НКК айар коллектива кыттыыны ыллылар.
![](https://vilalgis.ru/wp-content/uploads/2023/05/12345678.mp4_snapshot_04.51-1024x576.jpg)
Сөхпүппүт баар: уу нуурал, эйэлээх кэмҥэ алааска оттуу сылдьар кэми хайдах курдук дьиҥнээхтик, көрөөччүнү итэҕэтэрдии оонньуулларын! Ити бугуллары, көлүччэни, кыраабыллаах кыргыттары, хотуурдаах уолаттары көрөн олорон ол сыллары, эдэр сааспын харахпар көрөн, санаан ыллым. Оо, онтон сэрии саҕаланна, аймалҕан, атаарыы, туома маны харах уулаах көрдүбүт. Бу көстүүнү барытын тэрилтэ салаайааччыта, «Алгыс» НКК дириэктэрэ бэйэтинэн иилээн-саҕалаан, оонньоһоро кэлбит дьону сөхтөрдө, убаастабылы ылыан ылла уонна чахчы да бэйэтэ туспа талаан хаата киһи эбит!
![](https://vilalgis.ru/wp-content/uploads/2023/05/12345678.mp4_snapshot_39.17-1024x576.jpg)
Хор иккис ырыатыгар саалаҕа мустубут көрөөччүлэр сүһүөхтэригэр сүгүрүйэн турдулар. Бу ахтыы, сүгүрүйүү киэһэтин бэйэтэ айбыт «Кэрэ дьоммутун кэриэстиэҕиҥ» хоһоонунан киэргэттэ норуот маастара, Бүлүү куорат уонна Кэбээйи улууһун Баҕадьа сэлиэнньэтин бочуоттаах олохтооҕо Ефросиния Петрова.
Бары билэр, убаастыыр, СӨ култууратын үтүөлээх үлэһиттэрэ Марфа Спиридоновна Васильева (дирижер), Иван Туласынов Владимир Васильевичтыын үрүҥ көмүс тимэхтээх баяннарын доҕуһуолунан, ньиргиэрдээх хорунан сураҕа суох сүппүт буойуннарбытыгар анаммыт долгутуулаах, харах уулаах күн ааста.
Бу тэрээһиҥҥэ Албан аат музейын дириэктэрэ Клара Егоровна Саввинова, саха суруйааччыта Николай Иванов, Староватов аатынан музей дириэктэрин солбуйааччы Наталья Прокопьевна Сергеева кыттыыны ылбыттара хайҕаллаах. Маннык тэрээһиҥҥэ куорат, улуус салалтата кэлбэтэхтэрэ хомолтолоох.
Бу курдук иллээх-эйэлээх, биир дьиэ кэргэн курдук “Алгыспыт” барахсан мадам Марголуун өссө да элбэх дьон сэҥээриитин тардар айымньыларын кэтэһэбит.
Кырыыстаах сэрии хаһан да хатыламматын!
Подробнее: https://олохсуола.рф/article/97166
![](https://vilalgis.ru/wp-content/uploads/2023/05/WhatsApp-Image-2023-05-25-at-15.44.01-75x75.jpeg)
![](https://vilalgis.ru/wp-content/uploads/2023/05/WhatsApp-Image-2023-05-08-at-17.32.03-75x75.jpeg)